Tagliano i pini sul lungomare di Vibo Marina Bruno si arrabbia e scrive versi in dialetto

Caro amico, ti allego i versi rivisti in piccola parte, scritti dopo la sciagurata azione della nostra amministrazione: il taglio di 12 bellissimi pini che per circa 60 anni hanno abbellito il lungomare di Vibo Marina. Ho immaginato che anche i trapassati hanno subìto l'onta e sono tornati per accertarsene e farlo sapere! Ti allego inoltre due foto dove è chiaramente visibile lo scempio. Nota: al posto dei pini hanno messo quattro palme spennacchiate che, oltre a non avere alcuna attinenza con il nostro territorio, sono suscettibili all'aggressione del pericoloso "punteruolo rosso". 
Un abbraccio. Bruno Ceravolo 

REQUIEM PA PINETA I VIBU MARINA

Di prima matina supa o fierru i na panchina

massettai davanti o puortu i Vibu Marina.

Ere sulu, ma cuntientu ca u sule d’aprili

davieru mi stacia tuttu scarfandu, fin’e pili.

Fissava l’undi e i pescherecci jia guardandu

e chianu chianu u suonnu mi stacia gabbandu.

A gienti chi jia e venia davanti a mia passava

e u vucijare chi ci sentia però mi risbijava.

Comu fu comu non fu sedutu com’ere

all’intrasatta mi ntise supa a na spaja bottijare.

Mi girai i scattu u viju, ma nuju ‘nc’era,

pensai a nu scherzu, ca ccà è sempe na fera.

Non passau però mancu tantu tiempu

ca, poveru a mmia, mi pijjai natru spavientu.

Stavota i nuomi ‘ncunu chjanu mi chiamau

e di chiji arberi chi tagghjaru mi parrau:

“Pecchì cumpari Ntoni ficiaru sta porcheria?

Si dassavanu i pini chi mali ‘nci facia?”

Pecchì o puostu di chiji viecchj e belli pianti

ndi misaru sti parmi chi non cintranu nenti?”

“Senza a pineta, duve jati u vi rifriscati?

Sutta u sule non c’è puostu mancu u passijati!”

A vuci sentiendulu accussi parrari canuscivi:

ere cumpari Cicciu, u custurieri, u capiscivi.

Ma vui siti muortu, pecchì ccà tornastivu?

I mia chi diavulu voliti, chi castiju avistivu?

“Non tornai pe vui, cuomu delegatu mi mandaru,

mu mi riendu cuntu s’è veru ca ccà tuttu decimaru.”

E mo chi stu bellu spettaculu vidistivu

tornativinde pe favori i duve catinazzu venistivu.

Dassatinti puru suli ncia sta guerra d’ipocrisia,

e pregati pe nui, vui chi nente aviti i fare, e così sia.

“Ere mieggjiu u mi staju duv’era, nommu viegnu,

mi risparmiava nu viaggiu ed u cuntiegnu.

Mo mbeci sugnu di niervi assai pigghjatu,

si pienzu stu puostu com’era ‘ncio passatu.

Profumato e friscu d’estati ch’era na bellezza

cu’innamurati chi ndi facienu tanta tenerezza.

Mo puru u virdi ndi cacciaru, oh chi desolazioni!

Non è ca a stu paisi nci jettaru ‘ncuna maledizioni?

Sindacu e assessori ad agustu ccà hannu i stare

pemmu vidimu sutta u sule quantu puonnu supportare.

Ma mo, viatu mi nda tuornu o puostu chi dassai,

ca ccà ogni cosa nova chi ‘nci face, fa pena assai.

Prima u mi nda vaiu, vi dugnu però nu cunsiggjiu:

non v’arrenditi, parrati, u stare muti non è po’ mieggjiu!

Ma non vind’anccarricati, ca puru pe diji passanu l’anni

e nui, jià l’aspettamu, pemm’i vidimu senza mancu i panni”.

 V .V. 5.6.14 Bruno Ceravolo